Nagapakigbuylog ang hanay sang mga mangunguma kag mamumugon sa hasyenda sa idalom sang Kilusang Magbubukid ng Pilipinas Negros sa padayon nga panawagan sang hustisya sa brutal nga pagpatay kay Kaupod Randall Echanis sadtong Agosto 10, 2020.

Wala sang katupong ang kaakig sang mga mangungumang Negrosanon sa wala kaluoy nga pag torture kag pagpatay sa isa ka matuod nga alagad sang paghidaet, tigduso sang matuod nga reporma sa duta, tigdampig sang kinamatarung sang pumuluyo kag matuod nga huwaran nga lider akstibista.

Indi matawaran ang nangin kontribusyon ni Kaupod Randall para iduso ang kaayuhan sang pumuluyong mangunguma kag mamumugon indi lamang diri sa pungsod kundi sa kalibutan. Isa si Kaupod Randall sa mga kaupod nga naghalad sang bug-os nga panahon agud nga alagaran ang pumuluyo nga wala sang kabaylo, ini ginapamatud-an sang iya nga pamilya kag mga suod nga kaupod nga nakasaksi sang iya nga kabuhi.

Nangin importante man nga instrumento si Kaupod Randall agud nga mabalay ang CASER okun ang Comprehensive Agreement on Socio-Economic Reforms nga isa sa pinaka importante nga unod kuntani sang Isturyahanay Pangkalinong sa tunga sang National Democratic Front of the Philippines kag sang Government of the Republic of the Philippines.

Sa tagipusuon kg panghunahuna sang malapad nga pigos kag ginahimuslan nga mangunguma indi madula ang mga bilidhon nga kontribusyon ni Kaupod Randall. Mangin masanag nga suga ang kabuhi ni Kaupod Randall sa nagahimakas nga pumuluyo tubtob nga maangkon ang matuod nga demokrasya kag kalinong nga nasandig sa hustisya!

#JusticeForKaRandallEchanis

#StopTheKilling

Pahayag
Agosto 14, 2020
Reference:
Danny Tabura
Spokesperson
KILUSANG MAGBUBUKID NG PILIPINAS-NEGROS